« Aman d laman, akka i neqqaṛ g tmurt-nneɣ n Leqbayel zik mi ara yekker uminig ad iṭṭef abrid-is. Mi t-tefka tewwurt n ufrag, ad tekker yemma-s, neɣ tameṭṭut-is, ad t-tetbeɛ s ṛṛec. Idukal ččuṛen d aman, allen ččuṛent d imeṭṭi, imi yeččuṛ d awal ɣef “aman d laman”. Aman d laman, ṛuḥ fi laman, ad ak-yizdig webrid am waman…

Aman d laman, amzun kra n wid ččan yigarawen d yisaffen d laman. Wid tenɣa tzawa n tɣaltin, n yidurar, neɣ wid i ijemden g yideflawen, mačči d aman i hen-inɣan. »

Geldaman, mmi-s n wezṛu d waman, mmi-s yiṭij d yilel. Seg tmiqqwa ɣer tregwa, seg tregwa ɣer temda, seg temda ɣer wasif, seg wasif ɣer yilel; annect-a akk° n waman, wissen ma t-yessali ukuffit-nsen alamma d agennaw n waman: Anzaṛ.